«بومودورو».. يعني عم حسن

فاطمة زعزع

7 سبتمبر، 2016

المصدر: الصفحة الرسمية لبومودورو على الفيس بوك.

صلصة طماطم بخلطة عجيبة ماحدش بيعرف يعملها غيره، على مكرونة اسباجتي بالسي فود، تلك محصلة عم حسين من رحلة عمله بإيطاليا التي عاد منها ليبدأ قصة «بومودورو» والتي تعني الطماطم باللغة الإيطالية.
المكان مش هيديك اختيارات كتيرة، هو بالبلدى كدة مكرونة اسباجيتى تخينة – هو اللى عامل المكرونة نفسها – بالصلصة العظيمة وطبق سي فود كتييير، طب سيبك من الكمية، الطعم طب، مستوية تحفة ومتبلة، عظمة عظمة يعني مفيش كلام، طبق سى فود ملوكي اما تخلطة بالصلصة اللي تحته في المكرونة، والله مش عارفة اكتب كلام مناسب، مشكلتها بس انها صايصة شوية وكتير، غرقت نفسى وهدومى وايديا الاتنين لحد كوعى..
الجمبري بقشره من أحلى الأماكن اللي أكلت فيها جمبري، سبيط حلو جداً وكتييير برضه، شوية قواقع كدة مش عارفة نوعها وماليش فيها أوي بس دوقتها…وبختم بالكابوريايا الجميلة، ودى بتعتبر تحدي بالنسبالي بس مش بسيبها غير أما بتعور.
المكرونة بصلصتها خطيييرة -مع إن أنا من الناس اللي مش بتحب الصلصة الحمرة أصلاً ولا ليا في الإسباجتي- بس مع طعم السي فود اللي فيها ولما تاكلها معاه بيعملوا تناغم مزيكا.
الأكل كله نضيف وفريش، وممكن على فكرة تطلب الطبق بالجمبرى بس أو من غير مكرونة -طبق سي فود- وسعر أصغر طبق 80 جنيه بس مستحيل تكمله أصلاً من الكمية.
أنا روحته من سنتين في المكان القديم المستخبى فى شارع التحرير – عابدين وكان تحفة برضه -دلوقتي بقى الفرع ده للتيك اواي – بس المكان الجديد -في شارع نوبار- والأكل حلو زي ماكنت فاكراه، المشكلة بس إنه زحمة جدااااا وبتستنى برة كتير.
افتكر بس… إن نوع الأكل ده ممكن تلاقيه في اماكن كتير، السر هنا صلصة البومودورو، عم حسن بيرحب بالكل وزي ماقالنا ماحدش بيمشي من عنده زعلان.
يفضل الحجز قبل ماتروحوا عشان ماتتاخروش
يستاهل المشوار واللغوصة والاغماء اللي بعد الاكل اللي ممكن يستمر لأيام، بالهنا والشفا عليكوا.